Kinematografia shqiptare bashkon Ballkanin Perëndimor

TIRANE, 18 Tetor /ATSH/ – Arkivi Qendror Shtetëror i filmit ka nisur në 17 tetor 2016  sesionet e “Arkivat në Lëvizje” – AIM Workshops, me pjesëmarrjen e Ministres së Kulturës  Mirela Kumbaro, Drejtoreshës së ACP-së, Regina Longo, Drejtoreshës së AQSHF-së Elvira Diamanti, Kryetarit të QKK-së, Ilir Butka, Rektorit të AFM Marubi, Kujtim Çashku, Rayan Robert përfaqësues i zyrës së marrëdhënieve me publikun në ambasadën amerikane dhe të gjithë ekspertëve të ACP-së dhe pjesëmarrësve të AIM-së .

Projekti i Kinemasë Shqiptare (ACP) do të zhvillojë punët  rajonale trajnimi në Ballkanin Perëndimor për profesionistët e arkivave audiovizive. Këto arkivistë punojnë përtej mundësive për të ruajtur një trashëgimi të rrezikuar audiovizive e që ka pasur shumë pak mundësi të shihet përtej kufijve të rajonit.
14671359_1834593863419781_6409129097246129861_n-copyMinistrja e Kulturës, Mirela Kumbaro u shpreh se, “Ministria e Kulturës në ruajtje të trashëgimisë, duke patur parasysh vështirësitë e arkivit e ka mbështetur këtë projekt që në fillesat e tij, ashtu si edhe kemi mbështetur projekte të tjera të AQSHF-së me synimin për t’u treguar brezave jo vetëm një pjesë të historisë, por edhe një vlerë të artit kinematografik shqiptare.
Filmi është një nga gjinitë e artit që na bashkon të gjithëve. Njëherësh një nga artet që bashkon të gjitha gjinitë. Gjej rasti të falenderoj Regina Longo-n që nuk rresht së bashkëpunuari për restaurimin e filmave shqiptarë. Do të vazhdojmë të mbështesim edhe në të ardhmen projekte të tilla, që të krijojmë një raport në vazhdimësi për të ardhmen”.
ACP po bashkëpunon me Federatën Ndërkombëtare të Arkivave të Filmit (FIAF), Muzeun George Eastman (GEM), AV Geeks, Arkivi i Medias në San Francisco (SFMA), Bibliotekën e Kongresit Amerikan (LOC) dhe Ministria e Kulturës Shqiptare për të nisur Punëtoritë Arkivat në Lëvizje (AIM Workshops).
14642375_1834595140086320_6575436250219447456_nRayan Robert përfaqësues i zyrës së marrëdhënieve me publikun në ambasadën amerikane u shpreh tejet i nderuar për këtë bashkëpunim. “Unë nuk kuptoj shumë shqip, por nga filmat që kam parë kam mësuar një pjesë të historisë shqiptare dhe mendoj se ky takim me kinemanë e kaluar është e rëndësishme për brezat e rinj që të kuptojnë historinë nëpërmjet filmit”.
Punët  praktike të tipit laborator për profesionistët e arkivave, do të drejtohen nga një grup ekspertësh ndërkombëtarë profesionistë të arkivave audiovizive, të cilët do të dhurojnë kohën dhe ekspertizën e tyre, sepse për ta është e rëndësishme të punojnë me arkivat në rrezik dhe t’i aftësojnë arkivistët në procesin e prezervimit të koleksioneve audiovizive. 
Qëllimi i AIM është të aftësojë pjesëmarrësit në mënyrë që ato të maksimizojnë burimet që kanë në dispozicion, të punojnë me buxhete të kufizuara dhe numër të pakët punonjësish, dhe në të njejtën kohë të tregojë se si një nismë e vogël e tipit bëje-vetë shkon shumë përtej kur kombinohet me ekspertizën dhe njohuritë bazë të punonjësve të arkivave.
14724378_1834594556753045_5189756054222124278_n-copyDrejtoresha e AQSHF-së, Elvira Diamanti përshëndeti pjesëmarrësit në këtë punëtori. “Është detyra jonë ta ruajmë dhe mbrojmë këtë trashëgimi të çmuar të historisë sonë të dokumentuar, historisë dhe krijimtarisë kinematografike. Kemi vite që kemi bërë përpjekje për ta shpëtuar dhe sot ndihem e gëzuar që kemi kaq shumë mbështetës në këtë trashëgimi që shumë pak njihet përtej kufijve”.
“Kutia e vogël e kujtimeve që kemi në shtëpi është memoria jonë. Njësoj kështu duhet parë edhe kjo trashëgimi e madhe e AQSHF-së, kjo memorie kolektive, jo vetëm si pjesë e rëndësishme e trashëgimisë kulturore, por edhe si përmbledhje e punës së shumë artistëve. Detyra jonë është jo vetëm ta konservojmë, por edhe ta ndajmë me të tjerë”- u shpreh drejtori i QKK, Ilir Butka.
Rektori i AFM Marubi, Kujtim Çashku shprehu idenë e krijimit të një filozofie, një qasje sa i përket ruajtjes dhe mbrojtjes së trashëgimisë së arkivit, ç’ka ka nisur me projektet e mëparshme dhe këtë sesion trajnimi në AQSHF.
Sesioni i parë intensiv 2 -javor për prezervimin e koleksioneve audiovizive do të mbahet në Arkivin Qendror Shtetëror të Filmit (AQSHF) në Tiranë, nga 17-28 tetor 2016. /a.g/

https://www.ata.gov.al/kinematografia-shqiptare-bashkon-ballkanin-perendimor/

Share this...
Share on FacebookShare on Google+Tweet about this on TwitterShare on LinkedIn